By Rezo Nodwes -22 décembre 2021
Ministè kilti ak kominikasyon mande pou jenn yo prepare yo pou vi n ranmase anpli kado ak sipriz. Loreya konkou Tèks ak Chante Nwèl yo ap genyen yon machin tou nèf
Mèkredi 22 desanm 2021 ((rezonodwes.com))– Ministè kilti ak kominikasyon lanse yon konkou nasyonal tèks sou tèm : REKONSILYASYON AK LINYON …
Ministè sa, ke PM de fakto Ariel Henry ap dirije, deklare ke konkou sa lanse nan lespri fèt Nwèl la ki se yon fèt lanmou, lapè ak tèt ansanm epi nan lide pou ankouraje pwodiksyon nan zafè literati.
Konkou sa louvri pou powèt ak ekriven, ki nan laj ant 15 ak 35 lane, kit l ap viv Ayiti ou nan dyaspora a. Patisipan an ka ekri epi prezante on tèks an kreyòl ou an franse e voye li nan imèl sa: konkouteksnwelmcc@gmail.com anvan 31 desanm 2021.
Ministè Kilti ak Kominikasyon ap òganize tou yon konkou entèpretasyon chante nwèl. Pou otorite yo, Nwèl se fèt tout moun, se fèt timoun, se fèt granmoun, se fèt rekonsilyasyon ak linyon. Yon fèt ki pote lajwa, kè kontan.
Men pou konkou sa, se atis, chantè nan laj ant 15 ak 35 lane, kap viv nan Pòtoprens ak zòn sou kote yo sèlman ki ka patisipe nan bèl selebrasyon fèt sa a.
Pa gen anpil plas. Kidonk, mache prese…
Premye pri a se yon machin tou nef. Anpil kado ak sipriz ap tann rès moun yo dapre ministè a. Anpil kado ap tann res moun yo tankou : bous etid, laptop, telefòn, kat kado elatriye.
Pou plis detay sou dewoulman ak règleman sou konkou yo, moun ki enterese ka ale sou sit ak paj fesbouk Ministè Kilti ak Kominikasyon oubyen rele nan: 28 17 40 30.