By Rezo Nodwes -30 juillet 2021
KOLEKTIF OMAJ VIKTIM LETA YO (KOVIL) NÒT POU LAPRÈS
Pòtoprens 30 jiyè 2021 ((rezonodwes.com))–
Kolektif Omaj Viktim Leta yo ap enfòme popilasyon an, patikilyèman medya yo, ke lap òganize samdi 31 Jiyè kap vini la a soti 2 zè pou rive 6 zè nan aswè nan restoran Yanvalou, yon gwo sware omaj pou salye memwa jounalis-militant politik Marie Antoinette Duclaire ak Jounalis Vizyon 2000 la Diego Charles.
KOVIL /Kolektif Omaj Viktim Leta yo ki se yon zouti nan batay kap fèt pou pèmèt viktim masak yo jwenn jistis, patikilyèman Netty ak Diego, se yon estrikti ki pran nesans nan yon kontèks difisil ki asosye avèk asanina 2 jèn profesyonèl yo, Netty ak Diego, ki te bay tout yo menm pou avansman lit la ak pou amelyorasyon kondisyon lavi pi fèb yo.
Kolektif Omaj Viktim Leta yo klè sou objektif ak misyon l bay tèt li ,ki se goumen pou gen ankèt ki fèt sou tout masak ak egzekisyon sible ki fèt nan peyi a, KOVIL ap anplwaye estrateji nesesè pou fè presyon sou otorite polisyè ak jidisyè yo pou ankèt sou zak asasinay yo abouti, epi pote kole tou nan ranmase dèy tout konpatriyòt frè ak sè nou yo ki tonbe nan mitan batay pou kapote sistèm peze souse a.
Komite egzekitif KOVIL /kolektif Omaj Viktim Leta yo ap presize nan nòt si la a, ke seremoni omaj l ap òganize samdi 31 Jiyè a nan Yanvalou restoran , se yon siyal klè, yon jès patriyotik san parèy ki montre degre responsablite ak enplikasyon chak aktè ak òganizasyon manb kolektif la nan batay pou rive fè chak grenn moun ki tonbe nan move kondisyon nan peyi a jwenn jistis ak reparasyon.
KOVIL konte sou kolaborasyon ak patisipasyon medya yo, Atis yo, aktè kap milite nan estrikti òganize nan sosyete sivil la , etidyan, machann, ak tout lòt moun ki frape nan nannan zantray yo akòz masak oubyen pil egzekisyon sible ki fèt nan peyi a, pandan dènye lane sa a yo.
Pandan lap salye memwa viktim masak yo, prensipalman Netty ak Diego, kolektif Omaj Viktim Leta yo, retire chapo l pou salye tout ayisyen alawonn badè pou kouray, volonte ak detèminasyon yo.
Jistis Jistis Jistis ! Mèsi ! Otantifikasyon
KOVIL /kolektif Omaj Viktim Leta yo.
