MONDE
By: Dimitry Charles
Tribinal nan vil Pretorya peyi Afrik di Sid kondane yon kadejakè an seri pou pase 1 088 lane nan prizon.
Desizyon sa vini aprè akize a rekonèt li koupab paske li vyole 56 fanm nan anpil katye nan Pretorya pandan 5 lane.
Non kadejakè sa se Sello Abram Mapunya ki gen 33 lane. Selon enfòmasyon yo, endividi sa fè 41 vyòl, 40 kanbriyolaj, vòl ak zam san konte lòt enfraksyon li komèt.
Tout lè Mapunya t ap fè zak sa yo li t ap viv ak yon fanm, yon pitit gason l ki gen 8 lane ak pitit fi l ki gen 4 lane. Sa pat anpeche kadejakè a atake fanm ki tap viv nan zòn Tshwane de Nellmapius, Mamelodi, Silverton…
Pi jèn viktim kadejakè a te gen 14 lane. Viktim ki te gen plis laj la gen 55 lane. Mapunya te akize pou anviwon 101 enfraksyon diferant . Li te kòmanse zak li yo depi nan lane 2014 epi kanpe an mas 2019 aprè anpil detektif nan Inite Ankèt sou Krim Elektwonik an seri te arete li.
Se jij Papi Mosopa ki kondane li pou pase 1 088 lane nan prizon. Li kondane aprè li rekonèt li koupab pou 41 vyòl li komèt . 40 akizasyon vòl ki gen sikonstans grav epi 40 akizasyon “vyolasyon domisil”.
