22 novembre 2018 Rezo Nodwes
Les Petrochallengeurs de Ayiti Nou Vle A rejettent d’un revers de main le discours « inquiétant » et révisionniste du président Jovenel Moïse et se sont insurgés contre celui-ci pour avoir omis de parler du sujet qui les tient à cœur, la dilapidation des fonds PetroCaribe et d’autres dossiers d’intérêt national, comme le massacre de La Saline, l’insécurité à Martissant et dans d’autres coins du pays.
Jeudi 22 novembre 2018 ((rezonodwes.com))– Adrès a la Nasyon : Nòt Ayiti Nou Vle A sou Diskou Prezidan Repiblik la.
Pòtoprens, 21 novanm 2018
Onè,
Nou koute avèk anpil atansyon, diskou Prezidan Repiblik la sou sitiyasyon kriz grav kap travèse peyi a.
Prezidan an pale, li pa di anyen sou moun ki mouri nan manifestasyon pasifik yo, 17 oktòb ak 18 novanm pase a. Li pa di kisa k ap fèt pou fè limyè sou lanmò sitwayen sa yo.
Prezidan an pale, li pa di anyen sou moun ki mouri Lasalin yo. Li pa di kisa kap fèt pou fè limyè sou lanmò yo e ba yo jistis. Li pa di anyen sou Matisan, ak rès peyi a.
Prezidan an pale, li pa di anyen sou kisa ki ap fèt pou pwoteje popilasyon an ki twouve l nan gwo laperèz depi kèk tan lakòz bal kap chante lanwit kou lajounen.
Prezidan an pale, li pa di anyen sou dosye Petrocaribe a, kòmkwa, li pa egziste.
Diskou sa a enkyete nou anpil, sitou lè Prezidan an fè referans a 32 lane li di depi dezòd ap fèt nan peyi a. An 1986, nou kraze sistèm represyon fewòs, sanginè diktati Duvalier a te mete nou an. An 1986, nou pran libète lapawòl, nou kraze sistèm baboukèt ki te vle anpeche n denonse krim ki t ap fèt sou popilasyon an. An 1986, nou pran dwa pou jodi a nan lane 2018 nou tout ka mande #KotKòbPetrocaribeA.
Se pou sa nou envite, tout sitwayen ak sitwayèn, tout sektè nan popilasyon an, leve vwa yo byen wo pou yo kontinye san vyolans: denonse enjistis sosyal, lite kont koripsyon, mande jistis pou kanmarad yo ki tonbe.
Ayiti Nou Vle A ap denonse tout tantativ pou antere dosye Petrocaribe ak itilize mouvman #PetroCaribeChallenge lan pou enterè politik. Lit kont koripsyon an se batay nou tout. Yon batay ki pou mennen n sou chimen lavi miyò.
Ayiti Nou Vle A kanpe fèm opòs epi renouvle angajman l pou li kontinye batay ansanm ak tout sosyete a, nan lide pou chak Ayisyen, chak Ayisyèn viv nan diyite.
#KotKòbPetroCaribeA
Respè!