Nou tout bezwen lajan an pa vre?
Anpil nan nou ap mande l’. Gen nan nou ki te jwenn deja epi ki vle plis. Konsa tou gen lòt se paske yo fristre pou tèt yo pa t’ gentan souse manmèl.
Malgre moun sa yo pa kite tak dlo nan je yo pou fè wont sèvi kòlè, genyen plizyè milyon lòt k’ap mande lajan #petrocaribe paske se kou yo ke mouche Leta kòmanse kase jis pou jwenn lajan pou peye dèt sila.
Moun sa yo se moun :
– ki manje chak sen silvès;
– ki ale lopital lè yo about ak vye maldi kraze zo menm lè yo pa jwenn bon akèy ak laswenyay;
– ki sèvi pon pou gwo zouzoun ak bòt semèl an fè pase pou al tiye lespwa pitit ak pitit pitit yo
– ki pa ka rive voye pitit yo lekòl;
– ki egziste san idantite alòske yo konnen yo la chak eleksyon pr’al rive.
Moun sa yo se moun tankou m’ k’ap bat dlo pou fè mantèg. Yo pran lamizè ak de bra nan lide pou pote’l, bwote’l voye’l jete byen lwen epi koupe fache ak li.
Jodi a moun sa yo ap mande #Jistis. Wi jistis pou tout abi ke yo sibi. Pou move tretman ke yo jwenn nan men moun ki swadizan la pou ede yo jwenn yon moso pen, moso lasante ak moso pen lenstriksyon.
Nou tout ap mande : “KOTE LAJAN #PetroCaribe a?”.
Ala yon bèl jès sa papa. Nou montre yon fwa ke nou ka reyini pou sove lapatri…
Ou kwè se vre?
Ou kwè mwen p’ap reve?
Granmoun lontan toujou di si ou pa pare pou bay kou pa menase zòt.
Kilè n’ap sispann menase koupab yo?
Kilè Lajistis ap pran dosye a epi fè nou jwenn reparasyon epi pini koupab yo?
Nou tout vle chat la sispann devore sourit ak rat yo men kilès k’ap gen GNB pou mwen mete klòch la nan kou chat la? Nan kou chat yo?
Chat yo la, nou konnen yo men pèsonn pa vle sakrifye yo.
Li lè pou n’ di zafè grenn zanno ki kay ofèv la…!
Li lè pou nou mete yon lòt pè zanno tounèf!
Eske fanm je bande a gen ase GNB pou fouke fanm kou gason?
Jiskaprezan m’ap tann. Wi m’ap tann pou’m wè kijan nèg nwè je vèt, ayisyen tout plimay, cheve siwo kou tèt grenn ap antre nan depo pou zak yo fè sou peyi a.
Si m’ nan dòmi, Reveye m’ paske si nou pa mete men nan pat kasav endividi sa yo, kochma sa ap two rèd li dire twop!
Eske ou pare pou ede mete kloch nan kou chat yo?
Marvens Pierre
Sitwayen Ayisyen
*#PetroViktim