By: Dimitry Charles
Photo: Ody Bien-Eugène | Juno7
Yon elèv NS1 nan lekòl Mè Boudon tante tiye tèt li paske li pa pase, swivi sikolojik gen pou fèt pou li
Yon elèv ki nan NS1, nan mè Charite Sen Lwi anpil moun konnen sou non mè Boudon, te tante siswide tèt li jodi lendi 5 jiyè 2021 pandan yo t ap bay kanè.
Nan yon videyo ki t ap sikile sou rezo sosyo yo montre elèv la an inifòm, sou tèt lekòl la kanpe pou voye kò l anba. Sa ki te fè anpil moun afole, rele anmwe , paran lòt elèv ki te twouve yo nan espas la.
Redaksyon Juno7 la te rive sou plas kote sè Yverose Lazarre fè konnen elèv sa pa t arive fè mwayèn jeneral ke lekòl la mande a. Li fè yon mwayèn 4 premye fwa, yon mwayèn 5 fèb pou 2è kontwòl epi yon lòt mwayèn 4 fèb, yon 5 fèb ankò epi yon lòt 5 fèb. Mwayèn sa yo pa t rive bay mwayèn jeneral lekòl la mande a pou monte nan klas siperyè, daprè direktris la.
Photo: Ody Bien-Eugène | Juno7
Se la tou elèv la pete pòt li monte, li pran dènyè etaj lekòl la epi fè tantativ pou mete fen ak lavi li.
Manman an ki sou plas , ramne li ak rezon, élèv yo tou ta pral fè l kalme li. Gen swivi sikolojik ki gen pou fèt pou li, toujou daprè sè Yverose Lazarre.
Anndan lekòl la lè w pa pase, prensip la yo fè w double oubyen ou deside pa double epi deyò. Elèv la ke idantite l pa revele pa t ka sipòte echèk sa epi fè tantativ tiye tèt li.